Eldert Meeter sei it al:
‘De wedstriid hoecht om my net troch te gean,
sa wol, dan is it net foar fol.’
Hy seach de koppen op ‘e weagen stean.

Fjirtjin foeren wol fan wâl,
gjinien foar fol, de reef der dûbel yn,
dochs gie it foar de koppen mâl
en yn de triedden gûlde lûd de wyn.

’t Moantsje kriich him fol deryn
en tearde stadich oer de stjoerboardsboech,
de weagen makken him doe blyn,
dat Eldert hie gelyk, it waar wie rûch.

Ulbe Zwaga woe wol ha:
‘De wedstriid hie om my wol langer kind,
in heale stoarm, foar fol, no sa!’
Syn kop wie al oan rûge weagen wend.

Mei de hannen witte se gjin rie,
dy iene hat se by de rûtekaart
en Eldert*  foar de holle,
mar se hawwe by panyk gjin baat
en achterom sjen jout net folle.

Fjouwer skippers wiene yn de war,
se makken nei de start in misse kar.

Jelle** hie dêr gjin begrutsjen mei:
de skippers moasten sels nei ’t moarnsbesprek
oer start en sânglêsrûte,
oars ûntstie yn ’t glês in rare brek
en die de skipper letter boete.

Douwe*** briek lykwols de Lemster wet,
hy helle yn en is nei seis ta set.

Lemsters binne daliks út ‘e rie,
se sjogge op ‘e kaart en yn it waar
en brûke hân en mûle;
Jelle smookt nei ôfrin in sigaar,
no kalm, mar yn de striid in fûle.

* Eldert Meeter op De Fluezen
** Jelle Reyenga
*** Douwe Visser