juni 5, 2023
As de dei lûkt nei de jûn,
it túch him deljûn hat,
de wyn no noch net lizzen
giet fanwege ’t feestlik sicht,
dan wol ik swijend sizze:
Wolkom freugde fan de nacht,
de flagge lit jûn sjen
ús bliidskip om it folle
ljocht, dat mear is as dyn plicht,
do hast it yn de holle
jûn tichtby de wrâld te stean,
dy’t him kalm deljûn hat,
dat wy genietsje kinne
fan dyn knypeach yn de nacht,
do spegel fan de sinne.
juni 4, 2023
fan ûnbekend*
Lewisyt, dat klinkt as wie it wyt
en like suver as wie ’t snie
dêr’t noch gjin inkeld spoar yn sit;
wit dat wat moai klinkt, net sjen lit
wat lewisyt yn ’t easten die.
Sina seach Japan de grins oergean
mei man en macht, mar net yn ’t wyt,
it waard in swarte dei foar ’t lân,
der wie gjin sinne mear te sjen,
it rikke fan it lewisyt.
Striidgas wie it dat de grins oergie
fan wat der noch op trochgean koe
yn oarlochssituaasjes, dus
fersloech de boal it earme bern
mei gas, mar net allinnich doe.
Watfoar namme gas úteinlik krijt
en hoe’t it klinkt, it is net wyt,
it libben wurdt dêrtroch ûntwijd.
* Foto ‘Japan falt Sina binnen’