De timpel, koartlyn wijd, rûn ek gefaar,
panyk fleach troch Jeruzalem,
it hillichdom moast bliuwe;
de hegepryster Joäkim
soe opdrachtbrieven skriuwe.

Hjir is de strategy foar doarp en stêd:
Rûnom it eigen hillichdom
wurdt elke berch fersterke,
dat wrede Holofernes rêdt
it net.. of hat er flerken?

Mar dochs, wa is de Hear fan ’t hillichdom?
Syn sterkte kin Jeruzalem
beskermje tsjin de spearen…
it folk yn roukleed rôp ta Him
om ’t ûnheil op te kearen.

Nebûkadnessar en Arpaksad,
foarsten yn ’t gebiet fan ’t paradys,
sy stribben nei ultime macht,
de swakkens fierde nei ferlies,
de sterkte naam it tal yn acht.

Nebûkadnessar stjoerde boaden
út nei folken fier foarby de grins
om bystân tsjin syn aartsfijân,
gjin folk sloech acht op kenings winsk,
syn grime streamde oer it lân.

Nebûkadnessar sloech Arpaksads
leger fier werom, syn fijân wie ferslein,
sa kriich de foarst doe alle macht,
syn grime lykwols koe gjin ein,
oan folken balte hy de wacht.

Nebûkadnessar stjoerde ’t leger
út mei Holofernes, dy’t as generaal
de oarder kriich om bluodrich wraak
te nimmen, rûnom en finaal,
foar ’t legerhaad gjin heale taak.

* Byld ‘Nebûkadnessar’