januari 7, 2024
fan ûnbekend*
Tank ûntdekkers foar de remsliep,
dy’t út it lûde snoarkjen wei
de ljedder setten nei ’t bewuste
fan de kleare dei.
Hoe lang duorret noch it sliepen
mei dreamen fan it komt wol goed
en kalmte yn it ûnbewuste,
want dêr streamt gjin bloed.
Hoe lang moat de wrâld noch wachtsje
op merjes yn de neare nacht
dy’t elkenien klear wekker skodzje
om te sjen wa’t slacht.
Slaan alarm as men net wekker
wurdt, set dan op ’e sliep de rem
en ek de ljedder nei ’t bewuste,
gean foar bern en mem.
Lit de heit syn bern beskermje
wannear’t it sliept om net te sjen
’t ûnskuldich bloed troch de raketten,
mem ûntsjocht har bern.
Tank ûntdekkers foar de remsliep,
de ljedder kaam nei drok beweech
fan beide eagen nei ’t bewuste
libben rap omheech.
* Yllustraasje ‘Ljedder nei it bewustwêzen’
januari 6, 2024
fan Geo Poggenbeek*
Lit ús by heech en leech
it spylje hjoed de dei heechop,
it kin gjin útstel lije…
wa’t der oars oer tinkt,
flean op!
Sjedêr it wiete gea
fan eartiids, oardel iuw al lyn,
heech wetter koe doe lije,
elk wist wis: it is
mar skyn…
… dat floed it altyd wint
en eb de slach foargoed ferliest,
de kij gjin fretten krije…
ryd de wrâld út as
it friest.
Stiet hjoed de dei de wrâld
wol stil by bearen op ’e poal
dy’t ûnder wetter lije?
Oars wurdt elk foar har
de boal…
… dy’t net by heech en leech
it heechop spilet foar de wrâld,
men kin net langer swije:
it klimaat lit ús
net kâld.
* Skilderij ‘Polderlânskip’