oktober 27, 2023
fan Martin Johnson Heade*
De kamera leit bylden fêst
fan ’t lânskip wêr op ierde ek,
sa wurdt de werklikheid werjûn;
it skilderseach heint bylden op
fan ’t lânskip sûnder fêst te lizzen,
mar set geast en hân oan ’t wurk,
fêst hat sa’n byld wat mear te sizzen.
Lit Johnson Heade syn gong mar gean,
hy klimt net by de bergen op,
mar hat it each op ’t plattelân,
de greiden oan de eastkust fan
Amearika, dy’t iepen lizze
foar it each, safier’t dat rikt,
hy lit syn byld syn wierheid sizze:
Sjoch hoe’t de himel en it fjild
harmoniearje troch it ljocht,
dat mei syn strielen ’t fjild optilt.
* Martin Johnson Heade (1819-1904)
Skilderij ‘Newburyport Meadows’
oktober 26, 2023
fan ûnbekend*
Ezechiël
It riedsel, troch de Hear ferklearre,
oer twa fûgels as in earn sa grut,
ferhelle fan ’t massale stjerren.
De foarst fan Babel wie de earste earn,
hy hat de kening fan Jeruzalem
en al syn hege hearen meifierd
nei syn eigen lân, dat ta in wyngerd
waard: it folk is romte bean.
De foarst fan Babel sette op ’e troan
in ûnderkening yn Jeruzalem
om sa mei him oerien te kommen
dat ek Sion ta in rynske wyngerd
waard, mar falsk klonk dêr de toan.
Egyptes farao, de twadde earn,
dêr woe de ûnderkening wol op ta
om Babels kening te ûntrinnen,
mar gjin wyngerd kaam ta bloei yn Sion,
oantaast waard syn wif bestean.
In twiich wurdt plante troch de Heare
op ’e heechste berch yn Israel,
dy seder sil it needlot keare.
* Foto ‘Seder’