januari 21, 2024
fan ûnbekend*
fan ûnbekend**
It barde doe yn Finlân,
tusken west en east neutraal,
op de Spullen fan Olympus,
dat Tsjech Emil Zatopek,
de lange-ôfstân-rinner,
mei it goud gie op ’e haal.
De Finnen, neutraal folkje,
oars sa kâld yn oarde noard,
seagen Zatopek net sitten,
mar wol draven as in gek:
‘Oerein foar in ovaasje,
east of west, gjin punt, hy spoart.
De tiid ferrûn, it barde
letter dat neutraliteit
tusken west en east gjin opsje
wie, de Fin seach Zatopek
net sitten en net rinnen…
oarlochsdriging waard in feit.
* Foto ‘Emil Zatopek op de
Olympyske Spullen yn 1952’
* Byld ‘Emil Zatopek’
januari 20, 2024
fan ûnbekend*
Ezechiël
Der moast in rjochtdei komme
oer Ohola en Oholiba,
de hoeren fan twa stêden;
brutsen hawwe sy de trou
en bloed sit oan har hannen…
hoe soe de folksrie har dan rêde?
Sy ha mei goaden huorke,
slachten harren eigen soannen, sa
ha sy de ôfgod sêde
mei dat bloed en sûnder rou
fersmoargen sy de timpel…
hoe soe de folksrie har dan rêde?
Sy lieten manlju komme
dy’t har lichem yn de pronk set ha
en stiene om de bêden
hinne fan dy hoeren, trou
oan God waard sa ferbrutsen…
hoe soe de folksrie har dan rêde?
Sy binne net te rêden,
want it giet streekrjocht op ’t fonnis ta
fan ’t útrûgjen fan stêden.
* Foto ‘Frou mei bloedhân’