februari 12, 2024
Hy lit him amper sjen,
mar wol fan fierren hearre
as in bolle dy’t lûd balt,
in bist mei brune fearren.
Hy fljocht foarby as skym,
men soe him skôgje wolle
folle langer as er balt,
syn namme is reidbolle.
Syn hâlding is rjochtop,
lykas rûnom de reiden,
as in peal dy’t net opfalt,
stiet hy te poatsjebaaien.
februari 11, 2024
fan ûnbekend*
fan ûnbekend**
Se steane klear foar it begjin,
in swarte see fan helmen,
mei de pakken op ’e rêgen bûn,
sa waard de sege jûn as sin,
gjinien wist doe noch fan de ein…
de dea naam fiifentweintich kear miljoen.
De earen heine it ‘Sieg heil’,
dat withoefolle mûlen
sjonge op ’e mjitte fan de stamp;
se wiene ree fan hier oant neil
om fûl te striden oant de ein,
sadat de fijân trof de swierste ramp.
Sy stiet te gûlen by ’t begjin,
de bûsdoek heint har triennen,
want se wiene oer de frijheid rûn
fan ’t lân dat joech har libben sin,
gjinien wist doe fan boargers ein…
de dea naam achtentritich kear miljoen.
* Foto ‘Dútske troepen yn Neurenberch’
** Foto ‘Gûlende frou fanwege de besetting
fan Tsjechoslowakije’
