december 1, 2023
fan ûnbekend*
Hat ea in liuw syn klauwen
setten yn de hege liuwerots
as kening fan it diereryk?
It is de minske dy’t heech klimt
om dêr syn ryk te bouwen.
Foarst Kashyapa stichte
op dit stee de haadstêd fan syn ryk
mei syn paleis heech op ’e rots;
de poarte like op in liuw
dy’t sicht hie op ’e lichte.
In kening moat ek stjerre
al hoe heech hy stiet en fier hy sjocht,
de sitadel kaam leech te stean
oant muontsen krigen dêrop sicht,
de liuw is wer opfearre.
* Foto ‘Sigiriya-sitadel op Sri Lanka’
november 30, 2023
fan Ids Wiersma*
De fingers stiene lang al krom,
wat kaam fan wurk en rimmetyk,
de kwaal fan winterdeis de kjeld
fan bûtendoar yn iiskâld wetter…
sy wist net better.
De finsters wiene ek net ticht,
it siigde mei súdwestewyn
foaral, mar winterdeis mei wyn
út east mei snie yn plak fan wetter…
sy wist net better.
De eagen diene harren plicht
wat minder as sy hawwe woe,
mar rêden wie sy mei de bril
fan heit, hy hie itselde letter…
sa seach sy better…
… om út en troch wat op papier
te setten, iiskâld wie sy ryk.
* Ids Wiersma (1878-1965)
Skilderij ‘In âld klinte yn de Wâlden’