december 3, 2023
fan Walker Evans*
‘Let us now praise famous men’,
de lytse pachters yn it suden
dy’t wrotten foar it deistich brea,
ferearme troch it meunster
dat Depresje hjit, har oan te sjen.
Walker Evans seach it ek
en makke allerhande bylden
fan wrotters mei de frou en bern;
de earmoed waard ta keunst, mar
’t meunster hold noch lang in grutte bek.
James Agee skreau wurd nei wurd
by bylden oer it earme libben
en priizge dêrmei ‘famous men’,
de minsken mei gjin oare
kar as troch te wurkjen, lang en hurd.
‘Let ús now praise famous men’,
de hurde wurkers troch de tiden,
har bylden geane nea ferlern.
* Walker Evans (1903-1975)
Foto ‘Walker Evans’
Foto ‘Earmoed’
december 2, 2023
fan ûnbekend*
Ezechiël
In sichte tsjinnet om te meanen,
dan giet ommers neat ferkeard
wannear’t it nôt it minskdom sêdet,
mar wat docht it swurd… ek meane?
Oer it wurd fan God wie ik ferheard.
De Heare woe, ik soe myn wurden
smite tsjin it hillichdom,
want Hy soe mei it swurd ek meane,
net it nôt, mar likegoed de
goeden as de kweaden… ik wie stom…
… mar moast as minskesoan wol kreune
oant ik út ’e liken wie,
se moasten my lûd kreunen hearre,
dan soe har de moed ûntsinke…
joech myn kreunen noch wol rie?
* Foto ‘Swurd-sichte’