februari 22, 2024
fan Gerardo Dottori*
Kranen stekke boppe skoarstiens út,
dy’t rikje allemachtich troch
de dagen en de nachten hinne,
fan de helling glydt it stiel
dat koers set nei de Swarte See
om streekrjocht skot nei skot te sjitten,
boppe alles raast de loftfloat út.
Kleuren binne skier fan pearze walm,
dy’t krêftich op ’e stimbân slacht
om eigen lûden te ûntnimmen,
foarmen binne krom as stiel
dat bûcht op ’t fjurjend oarlochsskip,
sekuer kin dat de rjochting mjitte,
boppe alles út klinkt it alarm.
Naasjes, folgjend it djip leauwich spoar,
slaan krêftich op ’e tromme fan
geweld om sa de striid te winnen:
God… Jahweh, ek hurd as stiel,
ha likegoed in fêste koers,
dy’t sy oan naasjes witte litte,
boppe alles út sjongt ’t leauwich koar.
* Gerardo Dottori (1884-1977)
Skilderij ‘Fassistyske kreaasjes’
februari 21, 2024
fan ûnbekend*
Ezechiël
Sa’t Tyrus as in skip stekt
boppe alles út, sa is syn farren
foar de hannel oer de see;
dat skip is troch de folken makke
fan materiaal om foar te gean…
hoe lang wurdt dit skip sparre?
Fan Tyrus foeren skippen
oer de weagen haven yn en haven
út foar hannel op elk stee;
de skippen hiene ’t rom fol keapwaar:
sulver, koper, izer, tin en lead
en boppedat fol slaven.
It skip fan Tyrus stekt net
langer boppe alles út, syn farren
is foarby, fergien is ’t skip
mei skipper en tal fan matroazen;
folken fan de seekant rouwe om
dit lot, gjinien waard sparre.
* Yllustraasje ‘Skip fan Tyrus’