december 29, 2023
fan ûnbekend*
Sjedêr de skiere fierte
fan Europa’s grutste park
mei net te tellen spjirren
as de wachters fan Georgië,
dy’t fan de skiednis witte.
Hjir jage de elite,
dy’t ferrike waard mei ’t hout
fan spjirren, net te tellen
wiene stammen noch it kapitaal,
’t gie om in rike krite.
Sjedêr hoe’t it feroare
mei foarst Nikolajevitsj,
dy’t spjirren net lang wachtsje
liet op folk fan hiel Georgië,
it stapte yn syn spoaren.
* Foto ‘Nasjonaal park Bordzjomi-Charagaoeli’
december 28, 2023
fan Peter Paul Rubens*
Wêr binne de twa ingels bleaun
no’t hjoed de dei ek bern noch
flechtsje moatte foar de macht
fan beulen, honger en geweld,
it bliuwt foar harren altyd sneon.
Sy kinne net nei skoalle ta,
de snein wurdt harren ek net
gund, sy bliuwe yn de nacht
fan wekker wurde nei in dream
oer merjes, folle mear as twa.
Gjin byld fan ingels ûnderweis
en heit en mem mei ’t lytse
bern, de ezel mei syn fracht,
de dream dy’t oars ’t ferhaal fertelt:
beskerme troch dy twa op reis.
Wêr binne de twa ingels bleaun
yn dizze sekuliere
tiden mei fassisten oan
de macht, de kroan op stream nei stream…
it bern wurdt op ’e nij ferdreaun.
* Peter Paul Rubens (1577-1640)
Skilderij ‘De flecht nei Egypte’