januari 8, 2024
Noch jong en sûnder ûnderfining
fleach er mei syn maten op,
de hiele bûnte wrâld lei foar him,
lykas ek de fearren kleuren,
nei in wike stjitte hy syn kop.
It slagge net om út te wiken
foar in jonge mûzefalk
dy’t útgie fan ’t prinsipe fan de
sterkste, beide mei deselde kleuren,
macht jildt ek by ’t bûnte fûgelfolk.
Noch jong en sûnder ûnderfining,
mar mei ’t foardiel fan de macht,
leit hiel de bûnte wrâld noch foar him,
hy sil oer in miuwelyk net seure.
mar slacht op syn eigen libben acht.
januari 7, 2024
fan ûnbekend*
Tank ûntdekkers foar de remsliep,
dy’t út it lûde snoarkjen wei
de ljedder setten nei ’t bewuste
fan de kleare dei.
Hoe lang duorret noch it sliepen
mei dreamen fan it komt wol goed
en kalmte yn it ûnbewuste,
want dêr streamt gjin bloed.
Hoe lang moat de wrâld noch wachtsje
op merjes yn de neare nacht
dy’t elkenien klear wekker skodzje
om te sjen wa’t slacht.
Slaan alarm as men net wekker
wurdt, set dan op ’e sliep de rem
en ek de ljedder nei ’t bewuste,
gean foar bern en mem.
Lit de heit syn bern beskermje
wannear’t it sliept om net te sjen
’t ûnskuldich bloed troch de raketten,
mem ûntsjocht har bern.
Tank ûntdekkers foar de remsliep,
de ljedder kaam nei drok beweech
fan beide eagen nei ’t bewuste
libben rap omheech.
* Yllustraasje ‘Ljedder nei it bewustwêzen’