februari 5, 2024
Portugal troch iuwen hinne
’t lân dat socht de hichte op,
fan flakte nei de heechste berch,
sa foarme sûnder minskehân,
de tsjûge dêrfan is de sinne.
Portugal, lân dat bewenne
waard, troch wa wie ûnbekend,
mar menhirs tsjûgen fan ’t bestean
fan minsken mei in sterke hân,
sy lieten harren hichte kenne.
Portugal, lân fan Romeinen,
spyljend heech foar master op,
heech rikkend ek nei Jupiter,
de timpelbou troch minskehân,
wat menhirs al foarseinen.
februari 4, 2024
fan ûnbekend*
fan Gutzon Borglum**
Hy hinget op ’e holle
fan in wize presidint,
útkappe yn de hurde stien,
en sjocht de oare oan,
want neat is him tefolle.
Yn alle fjouwer seach er
wat foar ’t folk oan hichte wint:
de frijheid om rjochtop te stean;
op rjochten kaam it oan,
dat op dy hichte fleach er.
Hy koe it lykwicht fine
tusken keunst en polityk,
hat foar syn presidinten stien,
sa trof er krekt de toan
om ’t folk oan har te binen.
Sy sjogge nei de fierte
sa’t elk seach as presidint
om foar de rjochten yn te stean,
fierôf en ek nei-oan,
de wrâld hat dêrfan witten.
* Foto ‘Gutzon Borglum yn de klim’
* Gutzon Borglum (1867-1941)
Byldegroep ‘Fjouwer Amerikaanske presidinten’
(Washington, Jefferson, Lincoln, Roosevelt)
