april 30, 2024
fan ûnbekend*
‘America first!’
Sa hat de rop al iuwen klonken
fan it folk fan USA:
‘Wy binne ’t bêste lân op ierde,
mei oaren gean wy net yn see!’
‘America help!’
Sa klonk it troch de jierren tritich
hinne, Roosevelt wie ree
om Churchill út ’e brân te helpen,
Amearika stiek mei oer see.
‘America send!’
Sa klonk de gjalp út Oekraïne,
Biden woe wol, hat it wûn
Zelensky út ’e brân te helpen,
Amearika hat wapens jûn.
‘America first!’
Sa klinke op ’e nij de lûden
fan it folk fan USA
mei Trump as arrogante balter:
‘It bêste lân bliuwt op syn stee!’
* Foto ‘Flagge fan USA’
april 29, 2024
Kin men de driging noch ferneare
dy’t swier hinget as in flok
foar ’t folk dat gjin skuld hat
oan hiel it wrâldske barren,
oanset troch de hege hearen
boppe alle leed ferheven?
Dat folk sil net yn ’t tsjuster bliuwe,
bûge foar it neare lot,
mar stride foar wat hat
noch takomst foar de ierde,
iuwen oan ’t ferline riuwe,
hjoed moat sa’n feroaring heve.
Dan sil it lânskip grien opljochtsje
fan hoop op mear gelok
as wat de flok jûn hat,
dan sil it wrâldske barren
him net op ’e hearen rjochtsje,
mar it is mei ’t folk ferweve.
