februari 19, 2024
Hoewol’t er wyt fan foaren is,
jout hy de foarkar oan in mantel
dêr’t de kleur fan goed past by syn aard
en boppedat by ’t wetter…
hjir sjocht in miuw ’t faak donker yn.
Yn Porto sit in miuw net mei
de kar foar in bepaalde mantel:
by wat ljochter kleuren hat er baat
sa boppe ’t blauwe wetter…
dêr sjocht in miuw it helder yn.
Wat wis is yn de hiele wrâld,
fan Porto oan de Lytse Potten
ta, is foarkar foar in grut ferskaat
oan miuwen en oan minsken…
de wiisheid sjocht dat foardiel yn.
februari 18, 2024
fan ûnbekend*
Hy wie de dissidint
dy’t loek it rjochte spoar
fan ’t Kremlin nei de Swarte See,
fan machtsmisbrûk nei it paleis,
bewenne troch de wrede tsaar,
hy wie oanhâldend ûnderweis.
Hy hold syn krústocht fol
tsjin wa wie feodaal
korrupt op elk swart Russysk stee,
syn motto naam er mei op reis:
oplichters, dieven mei elkoar,
hy wie oanhâldend ûnderweis.
Hy wie foar ’t frije wurd,
loek rjocht it kromme spoar
fan ûnderdrukking elk idee
dat yngie tsjin wat Moskou sei,
sa rûn syn libben grut gefaar,
mar dochs bleau hy mei moed op wei.
Hy wie bestân tsjin gif
en ’t giftige ferhaal
fan rjochters mei de macht yn see,
sa stie syn libben iiskâld faai,
útwiske waard syn rjochte spoar,
mar net wat liet er oaren nei.
* Foto ‘Aleksej Navalny’