oktober 4, 2018
fan James Ensor*
De manlju oan de muorre skreauwe
mei de dolk en feger út ’e list:
stek en slaan him stjerrend…dea!
De bisten yn de hoeke gûle:
wa’t de slach of stek no mist,
dy spuit en spuitet bloed,
giet nei it likegea.
De manlju dy’t yn fjochtsjen leauwe,
knipe, klauwe, hymje, gjin gesicht
hoe’t de eagen flitse as
de wjerljocht foar de tongerklappen
op ’e noas, dy rekket ticht
en spuitet strielen bloed,
’t streamt oer de reade jas.
Twa fjochtsje dan noch om de iene,
spuitsje elk de reade noch wat yn
foar it libben of de dea;
’t is stjerrend wier, de bisten gûle,
nee, it is op ’t hôf de wyn:
de reade leit foargoed
as lyk yn ’t swarte gea.
* James Ensor (1860-1949)
Skilderij ‘It gefjocht’
Tekening ‘Dea en dokter by in grêf’
oktober 3, 2018
fan ûnbekend*
In wûnder dat ik der noch bin
en net foar dea hjir lis,
’t is wier, ik ha de Geast útdage
mei ’t fertsjinne jild mei swarte keunst,
it gie my inkeld om gewin.
’k Wie rûnom yn de stêd bekend
om keunstkes, troch Gods krêft
sa sei it folk, út alle lagen
kamen sy mei fragen om myn geunst…
Gods krêft, jawis, ’k wie net oars wend.
Doe kaam Filippus yn de stêd
mei wûnders troch Gods Geast,
wat oars wie as wat ik útheve;
daliks frege ik him om de doop,
want hy liet witte: ‘Jezus rêdt!’
Filippus’ maten kamen mei
de jefte fan de Geast…
’t gie mis, se ha mei my ôfweve,
want mei jild hie ik noch alle hoop
dat ’k keapje koe wat my wol lei.
Mar nee, ik gie mei ’t jild te fier,
myn keunstkes ha neat fan de Geast.
* Yllustraasje ‘Simon biedt de apostels jild oan’