februari 23, 2024
fan ûnbekend*
De hiele ierde op ien plak,
dat slagget sels net yn it lyts
mei stêden, bergen, oseanen,
mar Chiang Mai bea ûnderdak
oan lju mei each foar wat wol koe.
Sy kamen út ’e hiele wrâld
mei plannen foar in grut projekt
fan tunen út wol tritich lannen
yn Chiang Mai yn mannichfâld:
de hiele ierde op ien plak.
Noch altyd groeit en bloeit it dêr,
de hiele ierde yn it lyts,
model foar ’t nije hof fan Eden,
dêr’t gjin plak is foar ferdjer,
Chiang Mai, it gea fan wat en hoe.
* Foto ‘Chiang Mai, Tailân’
februari 22, 2024
fan Gerardo Dottori*
Kranen stekke boppe skoarstiens út,
dy’t rikje allemachtich troch
de dagen en de nachten hinne,
fan de helling glydt it stiel
dat koers set nei de Swarte See
om streekrjocht skot nei skot te sjitten,
boppe alles raast de loftfloat út.
Kleuren binne skier fan pearze walm,
dy’t krêftich op ’e stimbân slacht
om eigen lûden te ûntnimmen,
foarmen binne krom as stiel
dat bûcht op ’t fjurjend oarlochsskip,
sekuer kin dat de rjochting mjitte,
boppe alles út klinkt it alarm.
Naasjes, folgjend it djip leauwich spoar,
slaan krêftich op ’e tromme fan
geweld om sa de striid te winnen:
God… Jahweh, ek hurd as stiel,
ha likegoed in fêste koers,
dy’t sy oan naasjes witte litte,
boppe alles út sjongt ’t leauwich koar.
* Gerardo Dottori (1884-1977)
Skilderij ‘Fassistyske kreaasjes’