mei 12, 2024
fan ûnbekend*
Ezechiël
Minskesoan, hast wol fernommen
dat it folk it oer dy hat?
It praat giet by de doarren lâns
om út en troch by dy te kommen.
Yn in kloft sjochsto har kommen,
sittend harkje sy nei dy
as wiene sy myn folk dat trou
is oan myn Wurd, sabeare frommen.
Elkenien heart nei dyn wurden,
mar gjinien docht watsto seist,
ast har sa hearst, dan bart dat wol,
mar har bestean is al ferwurde.
Foar dat folk bisto in sjonger
by de lier, dyn leafdesliet
klinkt moai, mar nimmen docht dêrnei,
nei ’t wiere Wurd ha sy gjin honger.
* Yllustraasje ‘Lierspiler’
mei 11, 2024
fan ûnbekend*
Syn skouders binne breder
as syn lytse namme is,
syn pak ek folle blauwer
as de Sweedske wolkeloft,
mar is syn takomst wis?
Hy sjongt de stjerren fan de
himel, rapt der flink op los,
syn show kin sprekken lije
mei it liet Europapa,
mar is hy net de klos?
Syn Fryske bloed streamt troch de
ieren, fljocht soms samar op,
sadat de konfrontaasje
driget foar Europapa
te brûzjen nei in flop.
Syn brede skouders binne
gjin garânsje foar sukses,
syn blauwe pak sit nauwer
as Europapa, wrâldwiid,
ferneamd, ek nei de clash.
* Foto ‘Joost Klein’