maart 3, 2024
fan Marc Chagall*
Wannear’t it meunster spuit mei fjoer
nei’t hy as satan gromme hat
dat hiel it doarp de hel yngiet,
dan wurdt it read foar eagen.
De hoanne kraait de wenten oer
alarm, de ko balt hymjend mei,
de geit dy’t as ferstive stiet,
hat ek it read foar eagen.
Wat kinne âlders mei har bern
oars as it hûs út flechtsje nei
in plak fier oer de fierste grins
mei wer it grien foar eagen.
Wa’t net in bern ferlieze kin,
wês moedich, nim it risiko,
fermoardzje him dy’t is gjin mins,
stek út syn reade eagen.
Gjin meunster spuit dan mear mei fjoer
wannear’t de held net wachte hat,
mar yngie tsjin wa’t gromjend stie
mei satans swarte eagen.
* Marc Chagall (1897-1985)
Skilderij ‘It brânende doarp’
maart 2, 2024
fan ûnbekend*
Read, sjedêr de roazen,
byld fan leafde foar de held
dy’t mei it read foar eagen siet
wylst ûnrjocht oer it folk regearre
om’t gjin minskelibben telt.
Read, it bloed fergetten
fan ûnskuldigen troch kjeld
ferklomme troch in macht dy’t neat
ûntkomt en ek gjinien ûntkomme
lit, gjin minskelibben telt.
Read, de roazen op de
kiste roppe op de held
dy’t elkenien wol wêze kin…
hoefolle moatte der noch stjerre
foar’t in minskelibben telt?
* Foto ‘Roazen’