Rampsenario

admin

oktober 11, 2016

Rampsenario

Se sizze dat it wetter riist
omdat it folle waarmer wurdt
omdat it minskdom smoargens spuit
en dochs de boel derhinne bruit
omdat de see sa djip en grut
is dat gjin peil op ûnheil wiist.

Wa kin lykwols de rampen peile
as de grûn trochweakke rekket
en gjin skûlplak oan de bisten biedt,
de mûs de mûzefalken fiedt,
de mol de blauwe reagers bekket
en de wjirm leit bleat foar klysterneilen?

Mar sjoch wat yn de waarme, wiete wrâld
de mûs, de mol en wjirm derboppe hâldt;
de podden stekke paraplu’s omheech
dat ierdebisten skûlje heech en dreech.