Wat is it dat de minsken bynt
troch lok en lijen hinne?
It bloed dat sels it paad wol fynt,
sil oeral krûpe kinne.

De âlde heit, al jierren dea,
mar dochs syn wêzen getten
yn brûns, kin no wol sûnder lea,
hy hat syn streken setten.

De dochter sjocht har streken nei
fan kop en eigen holle,
de skildershân begjint sa mei
wat mem en wilskrêft wolle.

De soan is net yn ’t atelier,
mar sil as byld der wêze,
it bloed krûpt nei itselde stee,
sy ken him yn syn wêzen.

* Charley Toorop (1891-1955)
hat mei tuskenskoften njoggen jier,
fan 1941 oant 1950, oan dit skilderij
wurke (200 x 121 cm.).