Frysk notarissoantsje

fan Lourens Alma Tadema*

Lourens Tadema, notarissoantsje,
berne yn it doarp Dronryp,
dêr’t Frysk de fiertaal wie,
mar bylden sprieken him mear oan,
yn werklikheid en yn de sliep.

Lourens, selsbewuste puber, hoantsje
dat al kraaiend komt yn byld:
‘Ik bin al út ’e rie,
as keunstner sit ik op ’e troan,
in foarst wurdt droegen op it skyld.’

Lourens Alma Tadema, in keunstner
dy’t yn Londen fierde ’t feest
fan kleur en ryk bestean;
’t klassike spriek him byldzjend oan,
Romeinen doarmen troch syn geast.

Sir Lawrence Alma-Tadema,
fan Frysk notarissoantsje
nei  Ingelsk skilder, sa woe hy it ha.

* Lourens Alma Tadema (1836-1912)
Skilderij ‘Selsportret fan Lourens Tadema’
Skilderij ‘Selsportret fan Lawrence Alma-Tadema’