Se woene ha dat Antoinette
foar de ivichheid bewarre bleau:
sy wie te âld foar houlikslok
en hearde nea in berneskreau,
dat sy waard yn de ferve setten.

De kleuren wiene net oerdiedich,
want de ienfâld striele fan har ôf,
it hier siet stiif en sûnder lok,
de eagen blonken brún of blau,
it hûntsje wie mei har ienriedich.

Har bern, it moast ek yn de ferve,
wol twakleurich, want se tocht swart-wyt,
dêr siet er dan, har iennichst lok;
twa haadpersoanen stiene kyt
en as sy dea wie, soe hy erve.

* George van der Mijn (1723-1763)
waard yn Ingelân berne en festige
him foar syn tweintichste as skilder
yn Amsterdam.