Archive for the Skûtsjesilen category

Hy sit ferwezen op ‘e lûken
as de jongste fan de Meeter-ploech,
want de klap kaam bonkhurd oan;
se koene him as peiler brûke,
ûnder ’t seil hold hy it krekt noch droech,
want dêrfoar wied er skipperssoan.

Lizze skûtsjes oer itselde board,
gjin kop sil op ‘e oare rinne,
parallel, dus feilich sylt de float,
de rapste rinner sil it winne.

Komt it iene op it oare ôf,
dan kinne hurde koppen klappe,
ek al is de Iselmar net nau,
de skipper lit syn skûtsje stappe.

Doarp Huzum koe gjin lijen brûke,
sylde feilich oer it goede board
mei in konsintrearre ploech;
Súdwest kaam skealik út ‘e hoeke,
’t hie wat fan in oanslach, krekt gjin moard,
’t gie foar de jongste wat te rûch.

’t Wie op De Lemmer kostlik waar,
dus kaam it folk yn ljochte steat
by ’t brêgehokje nei de bank
foar praat oer spatier, gal en staar
en ek hoe wurdt it stal wer slank,
want praten kostet neat.

De skûtsjes kamen ek te praat:
Doarp Grou is hast al kampioen,
mar lit ús net ferjitte Snits
en Huzum komt ek út it skaad,
nee, Ljouwert blaft lykas in hûn,
mar docht op ’t wetter niks.

’t Wie op De Lemmer bjuster blak,
dus wie it folk yn ljochte steat
te sjen op skûtsje, strân en pier;
de wiisheid dreau fan plak nei plak,
gjin spanning siet mear yn de spier,
mar praten kostet neat.

It silen kaam ek op it aljemint:
Doarp Grou is noch gjin kampioen
en sjochris, achteroan leit Snits,
protest tsjin Huzum, wat in fint!
Hat Ljouwert hjoed de wedstriid wûn?
De Lemmer is net niks!