Archive for the Skûtsjesilen category

Dêr leit er mei de fok noch del,
mar alle spieren binne spand
foar ’t skot, dat klinkt bekend mar skel,
it stjoert de skûtsjes fan de kant.

It heale moantsje skynt noch feal,
mar strielet yn de wedstriid fol,
as earste fuort is mear as heal,
gjin oar skip twingt him út syn rol.

De haadrol hat de ‘Druiprek-boat’,
in shovel driuwt de mikser oan,
in ynnovaasje yn de float
en foar ’t publyk in top-fertoan.

De mânske mikser wie foar dong,
mar wurdt ek brûkt foar drank en bier,
men is op ’t lêst mar ien kear jong,
de shovel is foar ’t spul yn ’t spier.

Twa eagen stoarje achterút
as sieten alve skûtsjes op ‘e spegel
fan de Swan yn skeane need,
mar ’t skip foaryn is wis fan bút,
dat is op Grou no ienkear regel.

De skûtsjes brûzje nei ’t publyk,
dat spannend sjocht mei withoefolle eagen,
mar it hert hâldt nimmen beet,
gjin minske rekket yn panyk,
want Grou ken amper hege weagen.

It Grouster skûtsje sylt net bêst
foar ’t eigen folk mei ’t each op hjoed wer winne,
’t is foar leken faak in weet:
it skip sit oan de lêsten fêst
en lit de bút foar ’t swaantsje rinne.

Sjoch heit en soan mei wite pet
en bûtenlânske eagen op it wetter…
wurdt soan Ersin kampioen
fan hiel de wrâld… hy wit it net,
mar sjoch no Grou, hy docht it better.

Ersin Burkley út Nij-Seelân die yn 2003
yn de Optimist mei oan it wrâldkampioenskip
by de Kanaryske eilannen