november 22, 2016
By Mattéus 2, 13-15
Wize: Liet 122 út it Lieteboek foar de tsjerken
Joazef, man út Nazaret,
timmerman wie dêr syn fak,
hat him foar de oar ynset,
gie op reis fan plak nei plak.
Wittend fan syn namgenoat,
Joazef, yn Eygpte foarst,
foar himsels in feilich plak,
hat syn heit fan soarch ferlost.
Joazef wie fan Davids stam,
wer in kening nei Gods hert;
brânde altyd noch dy flam
of wie ’t kâld yn Nazaret?
Harkjend nei Marijes stim,
gie hy mei har op ’en paad
nei de stamstêd Betlehem,
dêr’t it berntsje berne waard.
Joazef dreamde, wie it echt
Gabriël dy’t by him stie?
Nei Egypte op ’e flecht,
hearde hy as wize rie.
Betlehem as Davids stêd,
doe Egypte, Joazefs lân;
wittend dat it Godsbern rêdt,
naam hy ’t jonkje by de hân.
Sjoch ek: Religy Tsjinst ‘Wês wach’
november 22, 2016
Wize: psalm 134
Hoefolle famkes boarten net
op strjitte yn stêd Nazaret?
Marije liet har dêr ek sjen,
in libben tusken blide bern.
Doe’t sy fan famke waard in faam,
wie ’t krekt oft Joazef faker kaam,
in moeting mei de timmerman,
dêr kloppe ’t hert har flugger fan.
Sy wie noch jong en amper frou,
mar oan it hûs fan Joazef trou,
doe kaam in ingel by har del,
it wie Gods gabber Gabriël.
It boadskip dat hy foar har brocht,
wie ’t heil troch ieuwen hinne socht:
‘God moetet dy yn Davids soan,
hy docht it sûnder troan en kroan.’
It gie Marije troch de lea,
har libben rûn sa earder nea,
it wie har wêzen oan te sjen,
de moeting mei it godlik bern.
De bergen oer klonk doe de rop,
Marije socht har tante op,
ferwachtingsfol wie it petear,
in moeting fan in dûbel pear.
Doe kaam de nacht dat Jezus’ stim
klonk yn de stâl fan Betlehem,
de moeting fan de mem mei ’t bern,
dat soanbyld gie nea wer ferlern.
Op ’t feest fan Kana joech de soan
de mem mei wyn syn ropping oan,
wat leech wie, rekke rânefol,
de wyn en wille streamden gol.
It gie op ’t feest fan Pesach ta,
mar ’t waard it krús op Golgota,
dat soanbyld stiek troch ’t memmehert,
in dreger moeting wie der net.
It barde op ’e tredde dei
dat libben dea de wierheid sei,
Marije hearde wer syn stim,
noch neier as yn Betlehem.
Sjoch ek: Religy Tsjinst ‘Wês wach’