december 28, 2018
fan ûnbekend*
fan Lionel Royer**
Gaius wie syn earste namme,
foar it folk wie hy de man,
syn frou kaam út in machtich skaai,
foar ’t folk oer hat er him net skamme.
Rhodos keas er om it praten
oan te learen, hy ferlear
syn frijheid yn de rôversbaai,
naam letter wraak op ’e piraten.
Fan Pompeius waard er skoanheit,
earst syn bûnsmaat yn de striid,
mar letter kaam de ommeswaai,
doe is syn skoansoan fan de troan waaid.
Caesar wie syn namme wurden,
machtich fjildhear yn ’t gefjocht
tsjin Galliërs, him yn de wei,
syn leger stried mei skerpe swurden.
Yn Egypte hat er striden
foar Kleopatra, ek yn
de leafde lei sy Caesar nei,
it wiene foar him gouden tiden.
Gaius Caesar triomfearre
as in keizer boppe ’t folk,
doe kaam foar him de needlotsdei:
troch moardnershannen soe hy stjerre.
* Byld ‘Caesar’
** Lionel Royer (1852-1926)
Skilderij ‘Vercingetorix smyt syn wapens
foar de fuotten fan Caesar’
december 21, 2018
fan Giuseppe Crespi*
Gjin domkop, sa’t syn namme seit,
want Brutus kriich úteinlik macht
yn Rome, nei’t er die as wie er gek
om te ûntkommen oan de dea,
syn broer lykwols ferlear it pleit.
Syn omke, dy’t earst kening wie,
sloech op in slang as teken acht
en stjoerde Brutus mei syn soannen mei
nei Delphi foar it wierheidswurd…
’t orakel joech in oare rie:
Wa’t joech as earste mem in tút,
waard foarst yn it Romeinske ryk;
de soannen sprieken oer dy memmedei,
mar Brutus’ lippen rekken oan
mem Ierde, ’t wie in slim beslút.
Hy konsul, Rome republyk
en yn dat ryk in raar komplot
fan eigen soannen tsjin de heechste heit,
in drama mei in skrille toan,
dy trije waarden ek ta lyk.
* Giuseppe Crespi (1665-1747)
Skilderij ‘Brutus jout de ierde in tút’