mei 17, 2019
fan Evelyn De Morgan*
Helena, berne út in aai,
dat lein waard troch mem Leda,
befruchte troch god Zeus as swan,
de manlju wiene fan har wei,
sy wie foar allegear de wiere.
Yn Sparta waard sy strieljend grut
en doe ûntfierd nei Troje,
dêr’t kreaze Paris wie har man;
der kaam in lange striid út fuort,
foar beide kampen wie ’t in swiere.
Nei Sparta gie har langstme út,
om’t Paris net mear libbe,
dus briede sy op ’t snoade plan
fan Griken ha op ’t lêst de bút,
wy sille de oerwinning fiere.
Sy wiisde oan de Gryk de wei,
dy’t siet yn ’t houten hynder,
dat grutter wie as Zeus de swan;
de Griken namen har doe mei
nei Sparta, want sy wie de wiere.
* Evelyn De Morgan (1855-1919)
Skilderij ‘Helena’
mei 10, 2019
fan Richard Westall*
Lit Damokles mar rinne
oan it hôf fan Dionysius,
hy joech heech op fan syn bestean
en lok, in seldsum lot
om mar ien kear te winnen.
In feestmiel kriich er oanbean
fan diktator Dionysius,
dat kaam nêst syn fertsjinne lean;
hy seach syn foarst as god,
op ’t lok liet hy him foarstean.
Lit Damokles mar ite
mei it swurd fan Dionysius
krekt boppe ’t brein fan syn bestean,
hy wist net fan it hoe
of wat, dus gjin ferwiten…
… oan Damokles, dy’t rinne
koe nei ’t miel fan Dionysius,
hy soe noch net nei ’t deadsryk gean;
dat barde dêr en doe…
soe soks noch heevje kinne?
* Richard Westall (1765-1836)
Skilderij ‘It swurd fan Damokles’