Willem Tjerkstra’s thússide

Archive for the Mytebylden category

admin

Sibyllen

Mytebylden

fan Michelangelo*

It wiene prysteressen,
troch Apollo yn ekstaze brocht
om de takomst te foarsizzen,
ûnheil lei der yn har lessen.

Apollo waard fereale,
ien Sibylle hied er op it each,
dy’t him frege lang te libjen,
’t waarden tûzen jier, wol deale…

… sy woe har dochs net bine
oan Apollo, dat sy bleau net jong,
waard noch lytser as in yntsje**,
krige mei de jierren pine.

It wiene prysteressen,
tolve sa’t it leauwe letter brocht,
ien fan har wie Noächs dochter,
’t wiene net te leauwen lessen.

* Michelangelo (1475-1564)
Skildering ‘Sibylle fan Cumae’
 
** krekel

admin

Seneca

Mytebylden

fan Peter Paul Rubens*

Hy koe mei wurden it wol dwaan
en spriek as reedner Rome oan,
behalve keizer Caligula,
dy’t him stjoerde nei in eilân ta,
as filosoof koe hy syn slach dêr slaan.

As pedagooch kaam hy werom,
want Nero moast in master ha,
dat wie de winsk fan Agrippina,
dy’t as mem it bêste foar him woe,
mar keizer Nero brocht har letter om.

Bestjoerder waard syn nije rol,
want Nero lei him ta op nocht
en wille: froulju, hynders, liuwen;
mar ’t wie letter dien mei Seneca,
hy hold it by sa’n keizer net mear fol.

As filosoof koed er it oan
dat hy him skikke moast yn ’t lot:
de swierste straf, hoewol ûnskuldich;
sels moast hy syn bloed as deastraf jaan,
as wiere stoïsyn is hy doe stoarn.

* Peter Paul Rubens (1577-1640)
Skilderij ‘De dea fan Seneca’

Archieven

Zoeken

  • Categorie

  • Datum