november 12, 2021
fan Henry Fuseli*
Theiresias seach om him hinne,
nijsgjirrich as er altyd wie
nei wat yn Thebe barde;
mei te sjen joech hy de rie:
‘Der is in wrâld te winnen.’
Hy wie nijsgjirrich nei goadinnen,
hoe’t sy har klaaiden, ek wannear’t
sy yn it neaken stiene;
’t gie doe op ’e kop ferkeard…
Athena as freondinne?
Wol nee, Athena stie fier boppe
Theiresias, al wie sy bleat;
hy moast syn sicht belije,
seach mei ’t swart foar eagen neat…
koe hy it noch fier skoppe?
Wis wol, want hy waard kompensearre
troch Zeus, yn plak fan sicht soe hy
de spraak as nije jefte krije:
as profeet brocht hy ’t folk by
wat oan ’t bestean mankearre.
* Henry Fuseli (1741-1825)
Skilderij ‘Theiresias fertelt de takomst
oan Odysseus’
november 5, 2021
fan ûnbekend*
Tarquinius as ymmigrant
hie grutte aspiraasjes,
dêryn waard er stipe troch syn frou:
‘Do wurdst fan frjemdling Romes foarst,
de tekens binne navenant.’
Tegearre gie ’t op Rome ta,
doe’t ûnderweis in earn syn
hoed meinaam en him dy ek wer brocht,
in teken dat er kening waard,
dy fûgel woe it sa ek ha.
Der woene mear graach op ’e troan,
de ymmigrant waard lykwols
kening, dy’t it folk brocht wat it woe:
in goede rie, dêrby de die,
dy beide spriek de minsken oan.
By ’t keningspear kaam ek in bern,
in slavesoan, sa waard der
sein, de styfheit woe him op ’e troan;
wa’t earder woene, spilen op,
dat spul waard troch de foarst ferlern.
Tarquinius as ymmigrant,
dy frjemdling rekke raar fan kant.
* Yllustraasje ‘Tarquinius en de earn’