maart 18, 2023
fan Ernst Alt*
Jeremia
Jeremia spriek Gods wurden:
Falle sil Jeruzalem
yn hannen fan de foarst fan Babel,
wa’t bliuwt, komt om troch oarloch,
honger en de pest, wa’t oerrint nei
de fijân, sil yn libben bliuwe,
dit is wat de Heare sei.
Ek de hege hearen sprieken:
Harkje, kening, net nei him,
mar lit dy keardel hjoed noch stjerre,
syn praat benimt de moed fan
’t folk en alle mannen yn de striid,
dus lit him net yn libben bliuwe,
want it is de heechste tiid.
Sedekia spriek as kening:
Yn jim hannen jou ik him,
want wat kin ik tsjin jim begjinne
no’t wy neat oars mear kinne?
Jeremia is bedarre
yn de bak djip yn de grûn,
dêr’t hy yn ’t goare slyk weisakke;
in bûtenlânske eunuch
hat oan de profeet wer útsicht jûn.
* Ernst Alt
Yllustraasje ‘Jeremia yn de put’
maart 15, 2023
fan ûnbekend*
Jeremia
Lang siet Jeremia finzen
sûnder nijs fan foarst of God,
wat koe hy noch betsjutte,
swier wie sa syn lot.
Op in dei rôp Sedekia,
kening yn Jeruzalem,
de finzene nei boppen
mei in fraach oan him.
Sedekia:
Hast in wurd heind fan de Heare,
jou it daliks oan my troch.
Jeremia:
Ja, jo kinne ’t lot net keare,
Babelsk kening wachtet noch.
Sedekia:
Wat soe ik fan dy ferwachtsje,
dy ha ik al moannen troch.
Jeremia:
Hoe kin ik de kening achtsje,
yn dy kelder sit ik noch.
Sedekia:
Myn profeten lieten witte,
Babelsk kening falt net oan.
Jeremia:
Lit my net ûnskuldich sitte,
jo ferlieze grif jo troan.
Wer siet Jeremia finzen,
mar ien bôle kriich er deis,
wat koe hy noch betsjutte
sûnder brea en nijs.
* Yllustraasje ‘Kening Sedekia’