mei 17, 2023
fan ûnbekend*
Jeremia
Wêrom hat Ammon nommen
Israels gebiet oer de Jordaan
as hie dit folk gjin soannen
dy’t wurde koene erfgenamt…
hoe koe it safier komme?
Dêrom sil Ammon hearre
kriichsgerop om stêden te ferslaan
dy’t dêrnei platbrând wurde,
dan is dit folk wer erfgenamt,
’t gebiet wurdt opwurdearre.
Mar Ammon sil lûd gûle,
sekkeguod om ’t skurve lichem slaan
en oer de deaden kleie,
it rekket fier yn ballingskip,
dat folk lang op ’e doele.
Sa wurdt dat folk fuortjage,
hielendal út har gewoane dwaan
mei op it liif de deaskrik,
elk swalket troch in frjemd gebiet
en hat syn lêst te dragen.
* Foto ‘Jordaan’
mei 13, 2023
fan ûnbekend*
’t Is út mei Moäbs gloarje,
alle stêden gean deroan,
in ein komt oan syn folksbestean,
ja, skriemend klimme se omheech
en roppend giet it derby del,
it lânskip sil feroarje.
It wurdt in woestenije,
dêr’t gjin minske noch ferkeart,
fan folksbestean nei ballingskip,
foar Moäb is ’t de earste kear
dat alle fetten reitsje leech,
der is gjin wyn te krijen.
Beklei him allegearre,
elk dy’t him by namme ken,
want brutsen is de hearskersstêf,
hy sit net mear op ’t eareplak,
mar op ’e smoarge grûn, sa leech,
hy is folslein mislearre.
* Foto ‘Moäb’