juli 5, 2023
fan ûnbekend*
Ezechiël
Minskesoan, nim farske klaai
en meitsje dêr in tegel fan,
tekenje Jeruzalem dêrop
mei skâns en legerkampen
as it teken fan belegering;
in bakplaat sil in muorre wêze
hurd as izer tusken My en ’t folk,
kear dyn gesicht dan nei de stêd,
in stêd fan rampen.
Minskesoan, jou dy dan del
en draach de ûngerjochtichheid
fan de minsken yn hiel Israel
– de jierren wurde dagen –
op ’e linkerside silst dat dwaan,
kear dy dan om, de rjochterside
stelt it ûnrjocht fan hiel Juda foar;
sa sil myn folk de swierte fan
de rampen drage.
Yllustraasje ‘Klaaitegel’
juli 1, 2023
fan ûnbekend*
Warskôge wie ik troch de Heare,
mar ik wist net wat te dwaan,
hoe kaam ik libben wer oerein
en koe al it ferkearde keare?
In hân fernaam ik, ’t wie de Heare
dy’t my wat te sizzen hie:
‘Oerein, profeet, de delling yn,
dêr sil Ik dy watst dwaan moatst leare.’
Ik seach de gloarje fan de Heare
yn de delling en foel del,
in geast yn my holp my oerein:
‘Do moatst dyn ear nei boppen keare.’
Ik hearde doe de Heare sizzen:
‘Slút dy yn dyn wente op,
dêr wurdsto stiif mei bannen bûn,
bliuwst sûnder oanspraak machtleas lizzen.’
Myn tonge koe ’k net mear bewege,
mar doe spriek de Hear my oan:
‘Dyn mûle sit net mear op slot,
sprek oan it folk op al syn wegen.’
* Foto ‘Hân út ’e hichte’