december 2, 2023
fan ûnbekend*
Ezechiël
In sichte tsjinnet om te meanen,
dan giet ommers neat ferkeard
wannear’t it nôt it minskdom sêdet,
mar wat docht it swurd… ek meane?
Oer it wurd fan God wie ik ferheard.
De Heare woe, ik soe myn wurden
smite tsjin it hillichdom,
want Hy soe mei it swurd ek meane,
net it nôt, mar likegoed de
goeden as de kweaden… ik wie stom…
… mar moast as minskesoan wol kreune
oant ik út ’e liken wie,
se moasten my lûd kreunen hearre,
dan soe har de moed ûntsinke…
joech myn kreunen noch wol rie?
* Foto ‘Swurd-sichte’
november 29, 2023
fan ûnbekend*
Ezechiël
Elk lân hat fjouwer streken
dêr’t de wyn út waaie kin.
Ha ’k as profeet de wyn ferspraat
fan ’t wurd dat út ’e hichte komt
nei alle streken fan it lân
en hat it noch wol sin?
Dit wurd kaam fan de Hear:
‘Minskesoan, kear dyn gesicht
nei ’t suden, smyt it wurd derút
dat krêftich út ’e hichte komt
tsjin wâlden yn it Suderlân,
sjoch do dit as dyn plicht.’
Fan God moast ik dit sizze:
‘Beammen stek Ik yn de brân,
de griene likegoed as dy’t
gjin blêden ha, want safier komt
it fjoer: ’t wurdt swart fan súd nei noard,
de brân rint troch it lân.’
Doe woe ik ek wat sizze:
‘God, de minsken harkje net,
se sizze nei dit fjoer-ferhaal…
sjoch him wer mei syn riedsel-taal.’
* Foto ‘Brânend bosk’