april 27, 2019
fan ûnbekend*
Romeinen, gjin noed ha oer machten
dy’t ûnder, mar ek boppe jim binne:
dea of libben, duvel of ingel,
noeden fan hjoed, de takomst mei lok,
de leafde fan God sil oerwinne.
Jim kenne it libben fan Kristus,
syn dea oan it krús; dat er opwekke
is, giet fier út boppe ús tinken;
meitsje jim oer de noeden net drok,
de leafde sil alles bedekke.
Romeinen, lit my dit werhelje:
gjin macht sil ús fan Gods leafde skiede,
dea of libben, duvel of ingel,
noeden fan hjoed, de takomst mei lok,
de leafde hat alles te bieden.
* Post yn de Romeinske tiid
april 24, 2019
fan ûnbekend*
Oer Abraham wol ik it ha,
in foarbyld ek foar de Romeinen,
dy’t wol witte wat in frjemdling is…
út Oer gie hy nei ’t westen.
It wie foar Abraham gjin die
om mei it krop foarút te rinnen,
want hy fielde him soms lang net wis,
hoewol’t er troch God roppen wie.
It kaam foar him op ’t leauwen oan
en net op wat de minsken kinne,
Abraham wist fan it kwea ferjaan
en fan ’t foarútsicht op in soan.
’t Komt net op rituelen oan,
jim as Romeinen kinne winne
Gods genede sûnder wat te dwaan,
wat David ek sei op ’e troan.
Oer Abraham ha ik it hân
en David, dy’t it heil foarseine:
wat in lok dat men beholden is
troch ’t leauwe yn ’t beloofde lân.
Yllustraasje ‘Paulus mei de brief oan de Romeinen’