juni 8, 2019
fan ûnbekend*
Hoe moat it no dan, bruorren?
Ja, sa sprek ik jimme oan,
want oarder moat der wêze:
stille froulju, manlju, heech fan toan,
sprekke, profetearje, lêze.
Yn frjemde talen sprekke,
nee, ik sis jim, kear dat net,
kin ien dy taal útlizze,
dan is dêrmei dat sprekken ret,
mar der is noch mear te sizzen.
Lit bruorren profetearje,
want dêr leare jimme fan,
mar froulju moatte swije,
’t profetewurd is oan de man,
froulju meie dat net krije.
Mar Paulus, soesto mije
’t wurd fan memmen foar de bern?
De Hear hat harren roppen
om nei de lytsen om te sjen…
’t frouljuswurd hat foar dy kloppe.
* Yllustraasje ‘Paulus’
juni 5, 2019
fan ûnbekend*
Jou acht op wat dy út ’e mûle komt,
want wurden spylje in foarname rol:
profetearje docht de kristen goed,
mar frjemde talen klinke hol.
Wa’t profetearret, krijt in rom gehoar,
om’t elkenien de wurden wol begrypt,
profesijen sprekt men út mei gloed,
wat inerlik de minske grypt.
Mar frjemde talen gean folslein teloar,
om’t al dy lûden gjin betsjutting ha;
wa’t dy talen sprekt, hat grif de Geast,
mei inkeld klank kin nimmen ta.
Lit ús ek profetearje foar wa’t komt
fan bûten, dat er rekke wurdt yn ’t hert;
wat him binnen oansprekt ’t aldermeast:
hy wurdt teplak, yn ’t ljocht ek set.
* Yllustraasje ‘Profetearje troch de Geast’