juni 6, 2020
fan Jophra*
Twa tekens kamen oan de himel:
in frou mei sinne, moanne,
tolve stjerren op ’e kroan;
in draak mei koppen, hoarnen,
diademen op ’e kop…
úteinlik gie it om de soan.
De soan waard troch de frou ferwachte,
se raasde fan de pine
by de berte, ’t gie har oan.
De ierde koe de draak ferwachtsje
en stjerren dy’t net skine
soene, ’t kaam op lijen oan.
De soan wie noch mar krekt op ierde
of hy soe iten wurde
troch de draak, mar ’t gie net oan.
God hat him nei de himel helle,
de frou is op ’e flecht slein,
sy kaam oan yn de woestyn.
* Jophra (1919-1998)
Skilderij ‘De frou, it bern en de draak’
juni 3, 2020
fan ûnbekend*
In mjitstok kriich ik yn de hân
om de timpel op te mjitten,
mar it foarhôf net, dat is it plak
foar alle heidenfolken,
dy’t de stêd as púnheap achterlitte;
twa tsjûgen seach ik kommen
mei sekken om it faaie liif,
mar wol ha sy de macht
oer wetters en oer wolken,
ek om pleagen op te roppen;
is har tsjûgenis folbrocht,
dan komt it Ofgrûnbist
om harren om te bringen,
wat giet yn tsjin tsjûgenis en rjocht;
har liken lizze op ’e strjitte
foar it each fan alle folken,
sy sjogge ’t drama oan mei nocht;
God bringt wer libben yn de tsjûgen,
ropt har nei de himel ta,
’t spytgnyskjend folk is kjel,
noch kjeller wurdt it by it stjitten
fan de ierde as sântûzen deaden falle,
de rest jout him by’t needlot del
en earet God.
* Yllustraasje ‘Twa tsjûgen’