augustus 15, 2020
fan ûnbekend*
In ingel seach ik op ’e sinne
mei de eachopslach omheech,
hy spriek de kloften fûgels oan
om ’t fleis te iten fan it beestfolk
fan heech oant leech.
It beest woe mei syn legers winne
fan wa’t op it hynder siet,
mar ’t beest waard pakt, ek de profeet,
de fint fan falske wûndertekens
mei wurd en die.
Tegearre waarden sy doe smiten
yn de fjoerpoel, nûmer seis,
it beestfolk kaam ek om, troch ’t swurd
fan wa’t op ’t hynder siet, de fûgels
ha ret mei ’t fleis.
* Yllustraasje ‘Fjoerpoel’
augustus 12, 2020
fan ûnbekend*
De himel seach ik iepenstean,
der kamen wite hynders út
mei ruters yn fyn linnen,
legers fan ’t fertsjinne lean.
De earste hiet Oprjocht
en Trou, hie eagen as in flam
en diademen op ’e
holle, strieljend fan fel ljocht.
Syn mantel wie sa read as bloed,
syn eigen, dat him kleure hie,
Gods Wurd kriich dy as namme,
’t kleed brocht heidenen yn noed.
De heidenfolken hearden oan
it oardiel dat de ruter brocht,
in skerp swurd út ’e mûle,
’t wite hynder wie syn troan…
… as Kening oer de keningen,
oer alle ierdske hearen Hear.
* Yllustraasje ‘Kristus Pantokrator’
