januari 6, 2021
fan Marc Chagall*
Breugeman
In merje foar de wein fan farao,
sa komst my foar it each, freondinne,
tusken hingers glimme wangen,
slank is dyn hals yn kralestringen,
sa rinst der strieljend hinne.
Breid
In foarst dy’t oan syn rike tafel sit,
sa sjoch ik dy, in grut bosk blommen
bisto, oars in boskje mirre,
dat rêstich leit tsjin beide boarsten,
sa fiel ik my ferromme.
Breugeman
Wat bisto moai, freondinne,
o, wat bisto moai,
as dowen binne dyn eagen.
Breid
Wat bisto moai, myn leafste,
do bist hearlik moai,
ús rêstbêd komt my foar eagen.
* Marc Chagall (1887-1985)
Skilderij ‘It breidspear’
januari 2, 2021
fan ûnbekend*
Wol harkje nei myn klacht,
hoe’t myn broers my twongen ha
te passen op ’e wyngerds,
dêrom bin ik brún ferbaarnd,
mar wêrom stean ik noch op wacht?
Ik harkje nei syn stim
as myn leafste my fertelt
wêr’t hy syn keppel weidet,
dêrom bliuw ik hjir net stean,
mar gean op slach op siik nei him.
Asto it plak net witst
wêr’t myn keppel hjoed tahâldt,
dan folgest mar de printen
fan de poaten fan de skiep,
dan bisto wis datst my net mist.
Myn leafste, tútsje my,
want dyn tuten binne swiet
as oalje, kostliker as
wyn, dyn namme jit ik út
as oalje, want ik hâld fan dy.
* Yllustraasje ‘Hoeder mei keppel’