juli 17, 2021
fan ûnbekend*
Wol harkje, folken, nei de fragen
dy’t klinke út ’e himel wei
en op ’e ierde fierder drage:
Wa meat it wetter fan de see ôf,
wa beakene de grinzen fan de himel ôf,
wa meat de boaiem fan de ierde op,
wa woech de bergen en de heuvels ôf?
Fan God klinkt fier de rop.
Wa wiist de Geast fan God de wegen,
wat wize riedsman jout Him gaadlik ûnderwiis
en is der wol ien dy’t Him ynsjoch jout
om rjocht te jaan oan minsken yn it nau?
’t Is God wol tafertroud.
De folken binne as de drippen
dy’t oan in amer hingje, lykas stofkes dy’t
neat weage, ’t lân is ek yn lichte steat,
de lannen oan de seekant falle ôf,
foar God is ’t neat mei neat.
Yllustraasje ‘Skealjes’
juli 14, 2021
fan ûnbekend*
Jesaja
Klim de heechste berch op, boade,
mei foar Sion ’t blide nijs
dat God der foar har kommen is;
wês net skruten, boade, rop it nijs
út foar Jeruzalem dat God
yn al syn krêft en macht deroan komt,
foar de stêd is de beleanning wis.
As in hoeder sil Er weidzje
hiel syn keppel, ûnderweis
bringt Hy de lammen byinoar,
dy’t Er oan syn hert nei ’t wetter draacht,
foar harren docht Er alle war.
* Yllustraasje ‘Hoeder mei keppel’
