september 1, 2021
fan Rembrandt*
Jesaja
Jawis, dit sis Ik as ferwyt:
do hast neat foar My dien,
gjin offer hasto brocht,
sels ha Ik dy net roppen heard
om help, dyn eigen gong bist gien.
Oan My wiest sels gjin krommel kwyt,
dyn sûnden hast My jûn
en ûngerjochtichheid,
dyn misstap wiske Ik wol út
en sûnden binne dy ferjûn.
Bring mar in oanklacht tsjin My yn,
dyn stamfaar wie ’t al mis
mei, ’t hillichdom waard ek
ûntwijd, sels troch de hegerein…
dyn ûndergong wie dêrom wis.
* Rembrandt (1606-1669)
Skilderij ‘Jeremia treurjend oer
de ûndergong fan Jeruzalem’
augustus 28, 2021
fan Hans Jordaens III*
Jesaja
Dit hat de Hear te sizzen,
Loskeaper fan folk Israel:
‘It folk fan Babel beart oer skippen,
better fiskersboaten fynt men net,
Ik lit se driuwe nei de see,
dêr binne se net mear yn tel.’
De Hear hat dit te sizzen,
de Rêder fan it slavefolk:
‘In paad ha ’k makke tusken weagen,
foar ’t Egyptysk leger wie it net,
de hynders rekken yn de see,
ferdronken yn de wetterkolk.’
Dit hat de Hear te sizzen,
de Helper fan folk Israel:
‘Hâld no net fêst oan it ferline,
bliuw net stilstean by de dei fan hjoed,
fernimme jim dan net wat komt,
in ein komt oan in âld bestel.’
De Hear hat dit te sizzen,
de Gids fan Israel, syn folk:
‘Foar jimme meitsje ik de paden
troch de wyldernis, troch de woestyn
in wei mei wetter foar de toarst,
foar jimme is it dier in tolk’:
‘De ear is foar de Heare!’
* Hans Jordaens (1590-1643)
Skilderij ‘De farao ferdrinkt yn de Reade See’