Posted by admin

Wurdt de Houkesleat in spegel
yn de winter dy’t net heevje wol,
dan giet it dûbelop:
gefoelens spylje elk in rol,
mar ’t is net neffens tiid of regel.

Dy twa mêsten litte witte
dat de skippers binne ûnder seil
en dreame dûbelop:
Op redens oer, de rider heil!
As earste oer de finish… sjitte!

Komme yn de spegel barsten,
dan bliuwt oer it skip yn glês-en-lead
mei ’t skynsel dûbelop,
de koers is nei de Houkesleat,
dêr’t trije skûtsjes skippers losten.

Nei it brekpunt, komplisearre,
hinget dat noch oaninoar
wat like langer fêst,
mar koartwei siet de kop dernêst,
troch ’t stoarmjen yn de war.

Medisinen, operaasje,
spesjalisten witte mear
as ’t brein fan in pasjint,
dêr’t seachsel stoarmet, lang al wend,
it libben docht soms sear.