Posted by admin

Hy song it liet fan troch de ieuwen hinne
striid, de âlde bard Bajan,
wylst fjouwer fingers oer de snaren strieken:
‘Harkje, striders, lear derfan,
jim kinne inkeld winne!’

En Igor, jonge noch, hy harke mei sân earen,
woe oer striid en oer it winnen leare.

It kaam safier, it lûd fan hoarn en tromme
rôp it leger op ta striid
en Igor focht as held, wist fan gjin wiken,
mar it swurd dronk bloed en tiid
en alle lûd ferstomme.

Dêr leit er, Igor, jonge noch, gjin swurd koe ’t keare
noch Bajan syn liet oer striders eare.

Sa klinkt it liet fan troch de ieuwen hinne
noch oer Jan en alleman
dy’t foar it rjocht fan ’t frije libben stride:
‘Harkje, folken, lear derfan
hoe’t jim it rêde kinne!’

* Viktor MichajlovitsjVasnetsov (1848-1926)
begûn syn karriêre mei realistyske skilderijen.
Letter lei er him ta op it útbyldzjen
fan myten, leginden en mearkes.
Skilderij ‘De âlde bard Bajan’
Skilderij ‘Nei Igors fjildslach…’

Neat hied er mei de barones,
mar wol mei syn Marie,
dy liet har sjen sa’t sy krekt wie:
in kreaze faam, goed by de les.

Sy wie noch moaier as it byld
fan Venus yn it hôf,
hy joech har Skepper alle lof
foar ’t leauwe myld, de leafde wyld.

In touter hong heech yn de beam
foar ’t rappe hin en wer,
it op- en delgean fan syn stjer:
it hôf fan Eden yn de dream.

Sy sette ôf en krige gong
as fûgel yn de flecht,
de brede sturt wie libbensecht,
dêr’t hy hieltyd in glim fan fong.

Hy kriich in prachtich byld fan har
en wie rap út ‘e rie,
sy liet har sjen sa’t sy krekt wie,
de touter wie in goede kar.

* Jean-Honoré Fragonard (1732-1806)
makke yn rokoko-styl ‘De touter’,
ien fan syn bekendste skilderijen.