september 23, 2018
fan ûnbekend*
fan ûnbekend**
Hy liet him jilde as profeet
mei boeken dy’t de iuw beskreaune
fan alderheislikst fûle striid,
sa kaam de wrâld de takomst oan de weet,
gjin wapens dy’t ferburgen bleaune.
It witten siet al yn it brein
as jonkje, want hy woe ferkenne
fan eigen nei de nije tiid,
sa waard de basis foar de takomst lein,
de wrâld moast oan syn wapens wenne.
De oarloch fan de wrâlden waard
ferklearre troch de Martianen,
tentakel-wêzentsjes fan Mars,
se strielen ’t Britske leger fan de kaart
oant ierdske wêzentsjes*** opkamen.
Doe kaam de oarloch yn de loft
mei fleanmasines om te sjitten
op wat op ’t grûnflak stikken moast;
atoomfoarsizzings duorren noch in skoft,
mar Wells syn brein hat dêrfan witten.
* Foto ‘Herbert George Wells’
** Boekomslach ‘Oarloch yn de loft’
*** Baktearjes en mikroben
september 22, 2018
fan Juan de Juanes*
Wy komme út in oare naasje,
mar as Joaden fiele wy ús thus
by Mozes’ Wet,
dy lear is likegoed foar ús.
Ik ha in romme ûnderfining,
wit dus hoe’t it yn it libben rint,
want elke trêd
is ûnderweis my wol bekend.
Wy ûnderfûnen argewaasje
fan in fint dy’t hold in hiele preek
tsjin Mozes’ Wet
en dat noch wol as sljochte leek.
Hy soarge mei syn praat foar dining,
dat wy sleepten ’t mantsje foar de Rie,
hy hie’t net ret
dat hy dêr foar de wetslju stie.
Sa kaam it op my oer teminsten,
want ik praat út ûnderfining wei
en út ’e Wet…
mar wat dy Stefanus dêr sei?
* Juan Juanes (1523-1579)
Skilderij ‘Stefanus foar de Hege Rie’