Hoe koe de foarst fan Java
’t himelryk ferbine mei de wrâld?
De ierde moast de hichte yn
en heffe boeddha foar’t behâld
fan mylde rein en sinneskyn.

De bergen joegen lava,
hurde stien bewurke mei ’t houwiel
ta blokken, mear as in miljoen,
dy’t heechop tilden boeddha’s siel
foar rike risping op ‘e grûn.

En doe’t de foarst fan Java
Boroboedoer mei syn folk beklom,
oerskôge boeddha ’t sillich neat,
it machtich bouwurk mealde er net om,
hy hat him stil nei binnen keard.

* Boroboedoer (778-850)
is de grutste boeddhistyske timpel
fan de wrâld