Paradyspoarte

oktober 20, 2016

Dy deis socht ik it paradys,
alteast de tagong ta dat gea,
de lju ferklearren my net wiis:
it hôf fan Eden fûn ik nea.

Ik seach in poarte op it grien,
de kleurfigueren joegen hoop
dat twa of trije waarden ien,
mar ’t swarte naam in oare loop.

Doe tocht ik dat de skerpe toer
de tagong wiisde fertikaal,
de flagge liet dêr neat fan oer
mei dwers patroan, diagonaal.

Mei wurge eagen fan de tocht
berikte ik in oar stik grien
en sjoch, dêr fûn ik wat ik socht,
dy trije kleuren wier ta ien.

Recente berichten