Lit hjoed de hoarn mar blaze,
lûd fan rûnom grut alarm
as teken fan de Hear syn dei,
de ein is fan it wisse wei,
elk sil yn ûnstjoer raze.

Manmachtich komt it leger
fan de Iene as in stoarm
mei flammen as in frettend fjoer,
gjin stoppel op it fjild bliuwt oer,
it giet fan heech nei heger.

Se klimme oer de muorren,
kringe oeral troch, as swarm
de wenten yn, gjinien is wis
omdat dy dei oan ’t kommen is,
de rêst lit him ferskuorre.

De Iene lit him hearre,
wylst de sinne jout alarm,
de moanne wurdt as roet sa swart,
sa’t ek mei ’t stjerreleger bart,
wa sil it net bestjerre?

* Yllustraasje ‘Profeet Joël’
Ingelske ikoan út ‘e 18^e  ieu