Fêst patroan

admin

oktober 10, 2016

Fêst patroan

Wat bart der by de fûgelhut
sa yn de iere moarn?
De fûgels ha it heechste wurd,
gjin kiker jaget har dêr fuort,
se lûke oer har keninkryk
in fêst patroan.

En efkes fierder by it krús
fan wetters klinkt de toan
fan achtergrûnmuzyk, de rûs
‘hoe komme wy hjirwei, wer thús…’
De motor draaide ’t skip yn ’t slyk,
in fêst patroan.

De iere moarn biedt noch wat oars:
de krusers jouwe oan
de rêst, it sliepen as in roas,
in snoarkjend blazen troch de noas,
in langer lizzend keninkryk
as fêst patroan.