Alexander, grutte Gryk,
dy’t libbe leafst by fiergesichten,
stoarre oer de Middellânske See,
hy dreamde fan it grutte ryk
dat foar him lei, hy soe it stichtsje.

Legermachten, gjin ûntwyk
foar dy ienfâldige soldaten,
mannichfâldich foar de bloedstriid ree
mei ’t each op Alexanders ryk,
oer frede foel noch net te praten.

Perzysk kening moast omlyk,
omdat de dream yn winst feroare,
mar de foarst bleau fier fan eigen see,
waard oerset nei it stille ryk,
nea joech er wer syn hoars de spoaren.

* Detail fan it Alexander-mozayk
(sirka 100 foar Kristus)