Woartelbrêge

fan ûnbekend*

Wannear’t in beek wurdt ta in stream,
dy’t kolket troch ravinen,
is der foar it folk gjin hâlden oan
om oan de oare kant te kommen,
inkeld yn in dream.

Wa’t dreamd hat oer de woartelbeam,
kin wol in oergong fine
om mei drûge fuotten oer ’t ravyn
te kommen: bûch de sterke woartels,
rin dan oer de stream.

Yn Meghalaya falt de rein
mei bakken út ’e himel,
gjin gebiet is wieter as dat gea,
mar troch de woartels fan banyan
wurdt in brêge slein.

* Foto ‘Ritymmen woartelbrêge
yn Meghalaya, Yndia’